SIRITA PASAL HIDUP SIA

Sia kana baranak di Hospital Queen kurang labi 47 taun dulu. Mamak sia adala dusun babak sia pula cina tapi ada anak nigiri.

Sia kana kasi basar oli Mama sia saja. Dalam kami punya kaluarga ada 3 urang adi-baradi. Abang tua sama adi purumpuan.

Mama sia karja jadi Amah sama Tukang Masak urang putih. Biar inddad sikul, kalu dia masak itu liong tau fu, sia punya cousin dari barbatu batu pun dapat tasium itu bau. Sabulum dia pecen, dia karja sama satu KM.


Kadang kandang nenek perempuan turun dari kampung kaki ayam, hairan sia dia buli tahan. bila sia suru dia pakai silipar, masam mabuk sia inda buli jalan lurus.

Sia punya nenek bobohizan, ada satu malam dia sambanyang turus kana rasuk inda la tau spirit siapa turus pandai sepeking......Dusun sia nenek sia tau. Tapi sayang indada kana kasi turun dia punya kepandaian




Sia pogi sikul sana St Agnes dan La Salle habis sikul 1979. Turus masuk ITM.

Tau la dulu dulu mana computer masam sikarang, kami budak budak main di atas bukit main timbak timbak.

Kalu di sikul main ini games la

- tapak-mau campion dapan balakang melakat sama punya tapak
- guli - kalu guli tiru butulbah sia ni
- Police & Thief
- Bubut
- Tapuk
- Rounders - masam itu cricket, tapi pakai bula tennis
- lawan biji gatah, mau kasi kuat sumbat lilin dalam

Kada kadang pegi siring laut cari lukan....sikarang macam indada suda. Kalu pegi KK naik basikal.

Pegi sikul sia naik itu bas Luen Thung tunggu sana dapan libary kk and pulang naik itu TUT (Tuaran United Transport-Kalu inda sala la). Kalu di kawasan likas, kana pakai itu Tuaran Road sia pegi KK. Indada coastal road time saya.

Kalu pasal tingu wayang, Cathay sama Captol lah, yang slau laku macam wayang Bruce Lee....selalu tingu kalas Kambing - 0.70cts sia dulu. Kalu inda duit sisip la itu banyak urang pigang tangan lau satu urang tua....

Kalu duduk kadai kupi munim cula, woi macam urang kaya.

Mama sia pula kalu inga kasian juga, jadi Amah dapat anak yang nakal nakal sama karas kapala.

Dia hidup sampai umur 65 taun, mati karana aneyrsuem. Tapi sukur juga dapat tingu anak sikit sikit bajaya.

Ini sirita sia kasi dedicate sama sumua Urang Urang Sabah.....Time is changing, Sabahan seem to be losing their identity.....we need to take stock otherwise not only the Young Generation will lose their identity, there will also lose the ability to speak their mother tongue and off course Bahasa Sabah.